“Ўзбекнефтгаз”: “Ғарбий Қуйи Сургил” конидан “Арслон” газни комплекс тайёрлаш қурилмасигача 9,1 км бўлган табиий газ қувури қурилмоқда
"Ўзбекнефтгаз” АЖ тасарруфидаги конлардан табиий газ қазиб чиқариш ҳажмини ошириш ва транспортировка қилиш тизимини яхшилаш мақсадида соҳада кенг кўламли ишлар амалга оширилмоқда.
Хусусан, “Ўзбекнефтгаз” АЖнинг 2023 йилги қурилишлар манзилли Дастурига Устюрт газ қазиб чиқариш бошқармасига қарашли “Ғарбий Қуйи Сургил” конидан “Арслон” газни комплекс тайёрлаш қурилмасигача бўлган табиий газ қувурини қуриш ишлари ҳам киритилган. Дастур доирасида кон ва қурилма ўртасида диаметри 426 мм, узунлиги 9,1 км бўлган коллектор қувурини монтаж қилиш ишлари амалга оширилмоқда.
Айни пайтда "Ғарбий Қуйи Сургил" конидаги 5 та қудуқни улашга мўлжалланган янги газ йиғиш пункти қурилиш монтаж ва сув билан синаш ишлари бажарилди.
Табиий газ қувурининг қурилиш монтаж ишлари пудратчи корхона - "Нефтгазмонтаж" МЧЖ томонидан қисқа фурсатларда амалга оширилди.
Қувурнинг ишга туширилиши натижасида "Ғарбий Қуйи Сургил" конидан қазиб олинаётган табиий газни "Арслон" газни комплекс тайёрлаш қурилмасига қайта ишлаш учун йўналтириш имкони яратилади.
Шунингдек, қудуқлардан қазиб олинаётган газ йиғиш пункти орқали умумлаштирилиб, қайта ишлаш учун етказиб берилиши ҳисобидан кунига қўшимча 50 минг куб метр табиий газ қазиб чиқаришга эришилади ва Республика эҳтиёжи учун етказиб берилади.
