“Ўзбекнефтгаз”: “Boeing”, “Airbus” компаниялари “GTL” синтетик авикеросинидан авиаёқилғи учун компонент сифатида фойдаланиш имкониятини тасдиқлади

Бош саҳифа Русский

“Uzbekistan GTL” заводида ишлаб чиқарилиши йўлга қўйилган синтетик керосин “Ўзбекнефтгаз” АЖ Бошқаруви раиси Меҳриддин Абдуллаев топшириғи билан Бухоро нефтни қайта ишлаш заводида тайёрланадиган “Jet А-1” авиаёқилғиси учун компонент сифатида қўлланилмоқда.

Бугунги кунга қадар авиация ёқилғиси учун хом ашё сифатида “GTL” керосинини синтетик компонент сифатида фойдаланишга “IAТA”, “ASTM International”, “Def Stan” халқаро ташкилотлари томонидан ижобий хулосалар олинган.

2022 йил 23 сентябрь куни “Boeing” компанияси “Uzbekistan GTL” заводида ишлаб чиқарилган “GTL” керосинни Бухоро нефтни қайта ишлаш заводида тайёрланадиган анъанавий “Jet A-1” авиа ёқилғиси билан аралаштириш компоненти сифатида ишлатиш имкониятини расман тасдиқлади.

25 сентябрь куни эса Франциянинг “Airbus” авиакомпанияси авиация ёқилғиси соҳасидаги техник талабларни тартибга солувчи “ASTM7566” халқаро стандартларига асосланиб, худди шундай тасдиқнома юборди.

Шу билан бирга, Швейцариянинг мустақил экспертиза, назорат, синов ва сертификатлаштириш билан шуғулланувчи “SGS” компанияси Бухоро нефтни қайта ишлаш заводида ишлаб чиқарилаётган “GTL Jet A-1” ярим синтетик авиаёқилғиси сифати халқаро стандартларга мувофиқлигини тасдиқлади. Бу эса, авиация учун ёқилғи сифатида фойдаланиш имконини беради.

Лойиҳага кўра, “Uzbekistan GTL” заводида ишлаб чиқарилган “GTL” керосинини нефть керосини билан аралаштириб, “Jet A-1” ярим синтетик авиация ёқилғиси ишлаб чиқариш учун компонент сифатида фойдаланилади.

“Ўзбекнефтгаз”АЖ Бошқаруви раисининг топшириғи билан айни пайтда завод мутахассислари “GTL” керосинини анъанавий ёқилғи билан аралаштирмасдан авиация ёқилғиси сифатида тўғридан-тўғри ишлатиш учун авиация ёқилғиси соҳасида халқаро назорат қилувчи органлардан рухсат олиш устида ишламоқда.

Эслатиб ўтамиз, “Uzbekistan GTL” заводи йилига 500 минг тоннагача синтетик керосин ишлаб чиқариш имкониятига эга.

Маълумот учун: Анъанавий нефтдан олинган керосин билан солиштирганда, “GTL” керосин олтингугурт диоксиди, азот оксиди ва заррачалар миқдори сезиларли аражада паст бўлган ҳолда ёнади. Бу самолёт ёқилғиси ёниши натижасида чиқиндилар миқдорини сезиларли даражада камайтириш, уни экологик тоза ва барқарор қилиш имконини беради.

“Ўзбекнефтгаз” АЖ Матбуот хизмати

#нефть #газ #энергия #скважин #инвестиция #добыча #углеводород #экономика #завод #нефтебаза #қудуқ #кон #иқтисод #аёқш