Ёнғин ва аварияларга қарши муваффақиятли синов
Бухоро нефтни қайта ишлаш заводининг хавфли ишлаб чиқариш объектларида ёнғинлар ва технологик ҳодисалар билан боғлиқ юзага келиши мумкин бўлган фавқулодда вазиятларни тезкорлик билан бартараф этиш бўйича шахсий таркиб ва авария хизматларининг тайёргарлиги синовдан ўтказилди.
Машқ сценарийсига кўра, суюлтирилган углеводород гази ортилган вагон цистернасидан чиққан ёнғин оқибатида содир бўлган аварияни тўхтатиш чоралари кўрилди. Қайд этиш жоизки, юқори хавфли объектлар қоидаларга қатъий риоя қилишни ва авария содир бўлган тақдирда ҳаракатларни аниқ мувофиқлаштиришни талаб қилади.
Машғулотлар давомида ёнғин ўчириш, газдан қутқариш, технологик ва тиббий хизматларнинг ҳамкорликдаги ҳаракатига алоҳида эътибор қаратилди. Эвакуация қилиш, ёнғин манбаларини тезкор ўчириш, ёндош ҳудудларни ҳимоя қилиш ва режали авария оқибатларини техник бартараф этиш алгоритмлари ишлаб чиқилди.
Тактик-махсус тадбирларда жами 254 ходим, 25 та махсус техника, жумладан ўт ўчириш машиналари, газ-қутқарув техникаси, мониторинг тизимлари ва мобиль қўмондонлик пунктлари сафарбар этилди.
Бундай ўқув машғулотлари ҳақиқий таҳдидлар юзага келганда ҳаракатларни таҳлил қилиш, мавжуд камчиликларни аниқлаш ва фавқулодда вазиятлар юзага келишидан олдин уларни бартараф этиш имконини беради.
Ўқув машғулотлари натижалари ходимларнинг юқори даражадаги тайёргарлиги, бўлинмалар ўртасидаги ҳамкорликнинг изчиллиги ва самарадорлигини кўрсатди. Белгиланган барча вазифалар хавфсизлик қоидалари ва стандартларига риоя қилинган ҳолда тўлиқ бажарилди.
