Америкалик инвесторлар билан ҳамкорлик мустаҳкамланмоқда
“Ўзбекнефтгаз” АЖ делегацияси АҚШнинг Нью-Йорк шаҳрида ҳамкорлар ва инвесторлар билан учрашувлар ўтказди.
Ташриф доирасида халқаро банклар, институционал инвесторлар, шу билан бирга, компания еврооблигациялари эгалари билан юзма-юз музокаралар олиб борилди.
Учрашувларда АҚШнинг етакчи инвестиция компаниялари — “MetLife”, “CalPERS”, “Marathon”, “Payden & Rygel”, “MFS”, “Aegon”, “HSBC Asset Management” ҳамда “Artisan Partners” каби йирик компания вакиллари иштирок этди.
Мулоқотда “Ўзбекнефтгаз” АЖ томонидан сўнгги йиллардаги ютуқлар, амалга оширилаётган муҳим лойиҳалар, барқарор ривожланиш кўрсаткичлари ва истиқболдаги режалар ҳақида батафсил маълумот берилди.
Шунингдек, томонлар соҳага оид сўнги янгиликлар ва истиқболдаги режалар юзасидан ҳам ўзаро фикр алмашдилар.
Бу каби мулоқотлар ҳамкорликни янада мустаҳкамлаш, янги сармояларни жалб қилиш ҳамда “Ўзбекнефтгаз” АЖнинг халқаро майдондаги имижини янада танитишда муҳим аҳамият касб этади.