Хом нефт етказиб бериш бўйича шартнома имзоланди
Бухоро нефтни қайта ишлаш заводи ва Туркманистоннинг "Petronas Carigali (Turkmenistan) Sdn Bhd (PC(T)SB)" компанияси вакиллари ўртасида хом нефт етказиб бериш бўйича шартнома имзоланди.
Мазкур келишув томонлар ўртасидаги фаол ҳамкорлик ҳамда "Ўзбекнефтгаз" АЖ иштирокида ўтказилган музокаралар натижасида шаклланган бўлиб, мамлакатнинг энергетик хавфсизлигини таъминлаш ва нефт-газ соҳасини ривожлантиришда муҳим рол ўйнайди.
Шартнома "Киянли" конларидан узоқ муддатли ва кафолатланган хом нефт етказиб беришни назарда тутади. Бу эса заводнинг ишлаб чиқариш қувватларини барқарор юкланишини таъминлаш ва нефтни қайта ишлаш самарадорлигини оширишга хизмат қилади.
Томонлар келишувнинг асосий шартлари, жумладан, ҳажмлари, етказиш муддатлари ва нарх белгилаш механизмларини муҳокама қилиб, барқарор ҳамкорлик учун қулай шарт-шароитлар яратишга келишиб олишди.
"Ўзбекнефтгаз" АЖ углеводород хом ашёси етказиб беришни таъминлаш ва нефтни қайта ишлаш қувватларини модернизация қилишга қаратилган ишларни жадал амалга оширмоқда. "Petronas Carigali" каби халқаро ҳамкорлар билан глобал энергетика бозорига интеграциялашиш, соҳанинг рақобатбардошлигини ошириш ва нефтни қайта ишлашга илғор технологияларни жалб этиш стратегиясининг муҳим қисми ҳисобланади.