Интеллектуал олимпиаданинг якуний босқичи бўлиб ўтди
Қайд этиш жоизки, давлатимиз раҳбари томонидан билимли ёшларга шароит яратиш борасида илгари сурилган кўплаб ташаббуслар ичида “Заковат” ўйинларини оммавий интеллектуал ҳаракатга айлантириш асосий ўринлардан бирида туради.
Билимга чанқоқ ва интеллектуал салоҳиятли ёшлар давлатимиз ва ҳукумат томонидан моддий қўллаб-қувватланмоқда.
“Ўзбекнефтгаз” АЖда ҳам кундан кунга ёшлар ўртасида юзага келаётган интеллектуал муҳит ўзининг ижобий натижасини кўрсатмоқда. Жамиятда тобора оммалашиб бораётган “Заковат” интеллектуал ўйини эса уларни бир жойга жамлаш, билимини намоён этиш ва оширишда муҳим аҳамият касб этмоқда.
Бугун Тошкент шаҳридаги “Заковат Арена” биносида “Ўзбекнефтгаз” АЖ тизим корхона ва ташкилотлари ўртасида Интеллектуал олимпиаданинг якуний 4-босқичи “Шахсий ўйин” бўлиб ўтди.
Унда олимпиаданинг аввалги босқичлари - “Brain ring”, “Заковат” ва “Quiz” ўйинларида иштирок этган Жамиятнинг Марказий аппарати ва 29 та тизим ташкилотидан жамоалар қатнашди.
Мусобақа натижаларига кўра I-ўрин "Ўзбекнефтгаз"АЖ, II-ўрин Бухоро нефтни қайта ишлаш заводи, III-ўрин “Uz-Kor Gas Chemical” қўшма корхонаси жамоаларига насиб этди.
Ғолиблар “Ernst & Young” Бизнес академиясининг Озарбайжон, Қозоғистон ва Тошкентдаги ўқув марказларида малака ошириш имконини берувчи сертификатлар билан тақдирланди.
Маълумот учун: “Ernst & Young” Бизнес академияси 25 йилдан ортиқ вақт давомида мутахассисларни касбий тайёрлаш ва малакасини ошириш бўйича МДҲ мамлакатларида консалтинг хизматларини кўрсатиб келади. Ушбу давр мобайнида турли соҳалардаги етакчи компанияларнинг 150 мингдан ортиқ мутахассиси ушбу Академияда тайёрланган.