Волейбол бўйича аёллар ўртасида ўтказилган мусобақа ғолиблари аниқланди
Давлатимиз раҳбарининг “Волейбол спорт турларини янада ривожлантириш чора-тадбирлари тўғрисида”ги қарорига мувофиқ хотин-қизлар ўртасида спортни оммалаштириш мақсадида “Ўзбекнефтгаз” АЖ томонидан “Волейбол чемпионати-2024” мусобақаси ташкил этилгани ҳақида хабар берилган эди.
Ўзбекистон Волейбол Федерацияси, Оила ва Хотин-қизлар қўмитаси ҳамкорлигида ўтказилган мусобақада “Ўзбекнефтгаз” АЖ Марказий аппарати, Жамият тасарруфидаги бошқарма ва корхоналарда фаолият олиб бораётган хотин-қизлар иштирок этди.
Биринчи ҳудудий саралаш босқичи Жамият тасарруфидаги корхоналарда сентябр ойида бўлиб ўтди, иккинчи гуруҳ босқичи 11-12 октябрь кунлари гуруҳларга бўлинган ҳолда Тошкент шаҳридаги “ЖАР” спорт мажмуасида ўтказилди.
Мусобақа якунига кўра, фахрли биринчи ўрин яна ўтган йилги мусобақа ғолиби Муборак газни қайта ишлаш заводи, иккинчи ўрин Шўртан газ кимё мажмуаси ва учинчи ўрин Бухоро нефтни қайта ишлаш заводи жамоаларига насиб қилди.
Шунингдек, “Энг яхши тўп узатувчи” номинацияси бўйича З.Жўраева, “Энг яхши ҳужумчи” номинацияси бўйича Л.Шомаматова, “Энг яхши ўйинчи” номинацияси бўйича Г.Очилова, “Энг яхши техникаси учун” В.Ўринова, "Ғалабага бўлган иродаси учун" А.Жумаева, "Энг ёши улуғ ўйинчи" Д.Қурбонова, "Энг яхши жамоа сардори" Н.Маматова тақдирланди.
Мусобақа ғолиблари диплом, кубок ҳамда қимматбаҳо совғалар тантанали тарзда топширилди.
