Ўзбекистонда илк бор тармоқсимон полиэтилен ишлаб чиқарилади
Мамлакатимизда илк бор тармоқсимон полиэтилен хомашёсини ишлаб чиқариш лойиҳасига оид якуний келишув имзоланди. Ушбу ҳужжатлар асосида “NASAF XCP TECHNO” қўшма корхонаси ташкил этилиб, лойиҳага расман старт берилди.
Мазкур корхона Шўртан газ кимё мажмуаси, Хитойнинг “Yunnan Xinchengpeng Polymer Technology” компанияси ҳамда “Ўзэлтехсаноат” уюшмасига аъзо “Techno Cable Group” корхонаси ҳамкорлигида ташкил этилди.
Ушбу лойиҳа натижасида Ўзбекистонда илгари мавжуд бўлмаган маҳсулотни ишлаб чиқариш орқали ички бозорнинг йиллик 25-30 минг тонналик эҳтиёжи маҳаллий маҳсулотлар ҳисобига қопланади.
Маълумот учун, тармоқсимон полиэтилен (PE-X) оддий полиэтиленга нисбатан анча мустаҳкам, эластик ва юқори ҳароратга чидамли бўлиб, сув ва газ қувурлари, иситиш тизимлари, электр изоляцияси соҳаларида қўлланилади.
8 миллион АҚШ доллари қийматидаги мазкур лойиҳанинг ишга туширилиши импорт ҳажмини йилига 30 миллион АҚШ долларига камайтириб, 65 та янги иш ўрни яратилишига ҳамда ички саноат тармоғини мустаҳкамлашга хизмат қилади.
