“Ўзбекнефтгаз” АЖ делегацияси Лондондаги “Uzbekistan Investor Day” тадбирида иштирок этди
“Ўзбекнефтгаз” АЖ делегацияси Лондон шаҳрида "Raiffeisen Bank International" ва "Finasia Capital" ҳамкорлигида ташкил этилган “Uzbekistan Investor Day” тадбирида иштирок этди.
Мазкур тадбир Ўзбекистоннинг йирик ташкилотлари ва халқаро инвесторлар ҳамжамияти ўртасидаги доимий алоқалар ва мулоқотларга кўмаклашиш мақсадида ташкил этилган бўлиб, тадбир доирасида “Ўзбекнефтгаз” АЖ делегацияси халқаро банклар, етакчи инвестиция ташкилотлари, институционал инвесторлар ҳамда еврооблигация эгалари билан бир қатор учрашув
ва музокаралар ўтказди.
Жумладан, дунёнинг етакчи инвестиция ташкилотлари — "Mesarete Capital, Ashmore", "J.P. Morgan Asset Management", "Finistere, Morgan Stanley Investment Management", "Abrdeen" ҳамда "Candriam" каби йирик компания вакиллари тадбирда фаол иштирок этишди.
Учрашувларда Жамият вакиллари томонидан компаниянинг сўнгги йилларда амалга оширган ислоҳотлари, трансформация жараёнлари, молиявий кўрсаткичлари ҳамда истиқболдаги лойиҳалари ҳақида батафсил маълумот берилди.
Шу билан бирга, мулоқотлар давомида компаниянинг барқарор ривожланиши ва ESG стандартларига мувофиқлашуви бўйича ишлар муҳокама қилинди.
Бундан ташқари, углеводород қазиб чиқаришдаги янгича ёндашувлар ҳамда халқаро ҳамкорлар иштирокида мураккаб захираларни ўзлаштиришда эришилаётган натижалар алоҳида қайд этилди.
Қолаверса, компания вакиллари ва инвесторлар ўртасида янги еврооблигация чиқариш режалари, газ тарифлари, капитал харажатларнинг тақсимланиши, давлат кафолати ва дивиденд сиёсати бўйича ҳам ўзаро фикр алмашилди.
Тадбир якунларига кўра, “Ўзбекнефтгаз” АЖ билан халқаро сармоядорлар ўртасидаги ҳамкорликни янада ривожлантириш, инвестициявий фаолликни ошириш ҳамда компаниянинг жаҳон молия бозоридаги имижини янада мустаҳкамлашга қаратилган дастлабки келишувларга эришилди.