KPI - самарадорликни ошириш ва стратегик мақсадларга эришишда муҳим восита
“Ўзбекнефтгаз” АЖ таркибидаги корхоналарда самарадорликнинг муҳим кўрсаткичлари (KPI) тизимини жорий этишга бағишланган тақдимотлар ўтказилмоқда.
HR департаменти мутахассислари томонидан Бухоро нефтни қайта ишлаш заводи, “Uzbekistan GTL” ҳамда Шўртан газ кимё мажмуасида ўтказилган семинарларда корхона раҳбарияти, етакчи муҳандислар, хизмат ва бўлим бошлиқлари иштирок этди.
Тақдимот доирасида KPIни жорий этишнинг мақсад ва тамойиллари, унинг ходимлар мотивациясини ошириш, меҳнатни баҳолашнинг самарали тизимини шакллантиришдаги роли ҳақида батафсил тушунтириб берилди.
Иштирокчиларга асосий кўрсаткичларни тўғри ишлаб чиқиш усуллари ва уларни танлашда ишлаб чиқариш жараёни, хом ашё сарфи, меҳнат унумдорлиги ва бошқа кўрсаткичлар ҳақида маълумотлар берилди.
Семинарларда ушбу тизимнинг ходимлардаги мотивацияни оширишдаги ролига алоҳида эътибор қаратилди. Тизим орқали корхона ўзининг ишлаб чиқариш, молиявий ва бошқарув фаолиятидаги натижаларни тўғри баҳолаш ва уларни стратегик мақсадларга мувофиқ равишда ишлаб чиқиш имкониятига эга бўлади.
Очиқ мулоқот тарзида ўтказилган тадбирларда мутахассислар ўзларини қизиқтирган саволларга жавоб олишди ва тизимни ишлаб чиқариш фаолиятида қўллашнинг амалий жиҳатларини муҳокама қилишди.
