Геологик-техник тадбирлар ва лойиҳаларни ўрганиш ишлари давом этмоқда
Аввал хабар берилганидек, “Ўзбекнефтгаз” АЖ томонидан жорий йилда углеводородларни қазиб чиқариш ҳажмини ошириш бўйича белгиланган вазифалар ижросини таъминлаш ва мавжуд муаммоли масалаларни жойида ҳал этишда ҳудудий корхоналарга амалий ёрдам кўрсатиш бўйича Ишчи гуруҳ шакллантирилган.
Айни пайтда Бошқарув раиси бошчилигидаги Ишчи гуруҳ Қашқадарё вилоятидаги Муборак ҳамда Шўртан нефт ва газ қазиб чиқариш бошқармалари конларида геологик-техник тадбирлар ижроси бўйича ўрганишлар олиб бормоқда.
Ўрганиш жараёнларида “Шўртан” конида амалга оширилган “E-kon” лойиҳаси доирасидаги газни тайёрлаш қурилмалари ва рақамлаштириш йўналишидаги ишлар, шунингдек, 2025 йилда ишга тушириладиган 5 та кичик компрессор станцияларининг қурилиш ишлари муҳокама қилинди. Пудратчи ташкилотлар билан бирга қурилиш-монтаж ишларини самарали ташкил этиш ва жадаллаштириш бўйича зарур кўрсатмалар берилди.
Муборак нефт ва газ қазиб чиқариш бошқармаси “Сомонтепа” конида қурилаётган кичик компрессор станцияси қурилиш-монтажи ва “Култак”, “Зеварда” конларидаги капитал таъмирлаш ишлари ҳамда “Алан” конининг терриген-юра қатламлари маҳсулдорлигини ўрганиш бўйича олиб борилаётган бурғилаш ишлари ҳам кўриб чиқилди. Тегишли департаментлар билан биргаликда тадбирларни тезлаштиришга қаратилган топшириқлар берилди.
Шунингдек, “Помуқ” ва “Зеварда” конларидаги сиқув компрессор станцияларидаги газ ҳайдаш агрегатларининг барқарор ишлашини таъминлаш бўйича амалга оширилаётган чора-тадбирлар билан танишилди. Ушбу объектларда метан сизиб чиқишларини камайтириш бўйича ESG йўналишида амалга оширилган LDAR лойиҳасидаги натижалар ўрганилди.
Жамиятнинг Қашқадарё вилоятида жойлашган ташкилотларидаги ўрганиш ишлари давом этмоқда.