Коррупцияга қарши комплаенс назорат тизимининг 1-ярим йиллик фаолияти сарҳисоби
“Ўзбекнефтгаз” АЖ томонидан комплаенс назорат тизими орқали коррупциянинг ҳар қандай кўринишини олдини олиш, соҳада ушбу иллатни йўқ қилиш, аниқланган коррупциявий ҳолатлар юзасидан зарур чоралар кўриш, шунингдек, меъёрий-ҳуқуқий ҳужжатларга риоя этилишини таъминлашга эришиш мақсадида самарали ишлар амалга оширилмоқда.
Жами 275,6 млрд. сўмлик хато-камчиликлар аниқланди
Хусусан, жамият тасарруфидаги бошқарма ва корхоналарда коррупцияга қарши курашиш, турли талон-тарожликларни олдини олиш, хавф-хатарларни баҳолаш ва минималлаштириш, молиявий хато-камчиликларни аниқлаш, бартараф этиш ва олдини олиш учун Молиявий ва комплаенс назорат департаменти томонидан 2023 йилнинг 1-ярим йиллигида тизимли ишлар ташкил этилди.
Ушбу даврда турли йўналишларда жами 275,6 млрд. сўмлик хато-камчиликлар аниқланди. Ундан 35,4 млрд. сўм миқдорида маблағ тегишли тартибда ундирилди ва 56,8 млрд. сўмлик маблағ иқтисод қилинишига эришилди.
Жумладан, 12 та корхонада турли йўналишлар бўйича комплекс ва мавзули ўрганишлар амалга оширилган бўлиб, 112,9 млрд. сўмлик молиявий хато-камчиликлар аниқланган.
Шунингдек, ўтказилган ўрганишлар натижасида 115,5 млрд. сўмлик муддати ўтган дебитор қарздорликлар аниқланиб, 7,6 млрд. сўмлик умидсиз дебитор қарздорликларнинг ундирилиши таъминланди.
Аниқланган жами 51,4 млрд. сўмлик хато-камчиликларга ҳуқуқий баҳо бериш ва қонуний чоралар кўриш мақсадида, ўрганиш ҳужжатлари ҳуқуқни муҳофаза қилиш идораларига тақдим этилди.
Санкциявий чекловлар текшируви
“Ўзбекнефтгаз” АЖ фаолиятида потенциал санкциявий чекловларни олдини олиш мақсадида хорижий ҳамкорлар билан муносабатларда хавф-хатарларни бахолаш ва уларнинг олдини олиш бўйича ҳам ўз вақтида чоралар кўрилмоқда.
Жамиятнинг харид шартномаларини тузиш ҳамда маблағ кўчириш билан боғлиқ департаментлар томонидан киритилган сўровларга асосан жами 24 та чет эл корхоналари санкциявий рўйхатларда мавжудлиги юзасидан текширувлар ўтказилди.
Аноним сўровнома натижаси
Коррупциявий хавф-хатарларни ўрганиш, унинг олдини олиш ҳамда оқибатларини бартараф этиш учун тизимдаги корхона, бошқарма ва нефт базаларида фаолият олиб бораётган ишчи-ходимлар ўртасида аноним сўровнома ўтказилди.
Аноним сўровномада 28 та тизим корхоналарида фаолият олиб бораётган 30 181 нафар ходимдан 25 248 нафар (84 фоиз) ходим иштирок этди.
Натижаларга кўра, жами 67 та ходим орасида ўзаро потенциал ва реал манфаатлар тўқнашуви ҳолатлари аниқланган бўлиб, уларни бартараф этиш мақсадида ходимлар бошқа лавозимларга ўтказилиши таъминланди.
372 та ишга кирувчи номзод ўрганилди
“Номзодларни ўрганиш бўйича Йўриқнома”га мувофиқ комплаенс инспекторлари томонидан 372 та ишга кирувчи номзодлар ўрганилиб, шундан 327 та ҳолатда “ижобий” ва 43 та ҳолатда “салбий” ҳулосалар берилган.
54 та ариза ва 35 та шикоят белгиланган тартибда кўриб чиқилди
Жамият фаолиятида очиқликни таъминлаш, коррупциявий ва ноқонуний ҳатти-харакатлар юзасидан Жамият ходимлари, қолаверса жамоатчилик томонидан мурожаатларни ўрганиш мақсадида ташкил этилган алоқа каналлари орқали жорий йил бошидан жами 54 та ариза, 35 та шикоят белгиланган тартибда кўриб чиқилиб, мурожаат муаллифларига тегишли жавоблар йўлланган.
125 та семинар-тренинг ташкил этилди
Жамият бошқарма (завод) ва корхоналарда коррупцияга қарши курашиш ва комплаенс соҳасида ходимларнинг ҳуқуқий саводхонлигини ошириш учун 8 220 та қуйи ташкилотлар ишчи-ходимлари иштирокида тасдиқланган режа-графикга асосан 125 та семинар-тренинг ташкил этилди, 25 та иқтисодий ўқиш ўтказилди.
Шунингдек 50 дан ортиқ ходимлар ISO 37001 халқаро стандарти талабларига мувофиқ ўқитилиб, тегишли сертификатлар тақдим этилди.