Сонымен қатар аяттың жалғасында: «және (қайғы-қасіретте, ауыртпалық түскенде, сондай-ақ тура жолдан таймау һәм асау нәпсі мен әзәзіл шайтанға ермеу мәселесінде) бірін-бірі сабырға шақыратындардың жөні бөлек», – дейді. Яғни «Сондай-ақ өзара бірін-бірі қиыншылықтар мен ауыртпашылықтарға сабыр етуге, тыйым салынған істерді тәрк етіп, құлшылықпен айналысуға өсиет ететіндерден басқасы» дегенді меңзеуде.

Келесі аятта: «Тек иман келтіргендердің, соған сай (өздерін һәм бүкіл қоғамды түзеуге бағытталған) игілікті істер атқаратындардың» делінеді. Яғни: «Иман келтіріп, салиқалы амалдар жасап, екеуін бір арнада тоғыстырған пенделер – міне, солар жеңіске жеткендер. Өйткені олар болмашы нәрсені аса қымбат нәрсе үшін сатып, өткінші құмарлықтардың орнын мәңгі пайда келтіретін ізгі істермен ауыстырған», – деп, аяттың жалғасында: «Бір-біріне ақиқатты насихаттайтындардың», – дейді. Яғни: «Сондай-ақ бір-біріне ақиқатты өсиет ететін», – деуде. Мұндағы ақиқат дегеніміз – иман келтіру, растау және Рахман Аллаға құлшылық ету сынды бүкіл жақсылықтарды ұғындырады.

Сүренің алғашқы аяттарында: «Ғасырға (уақиғаларға толы заманға, әсіресе, ақырғы бөлігіне) серт! Шынында, адам баласы зиян ішінде», – делінеді. Бұл «Ғибратты уағыздар мен оқиғаларды һәм алуан түрлі ғажайыпты қамтыған ғасыр мен уақытқа серт беремін, расында, адам баласы қасіретте. Өйткені ол фәни дүниені ақиреттен абзал санап, тән құмарлықтары мен бос нәрселерге бой алдырады» деген мағынаны білдіреді.